為咗幫 2024 年能登半島地震受災嘅小朋友帶嚟笑容，並振興當地觀光，石川縣同「POKÉMON with YOU 財團」達成深度合作。佢哋決定將能登觀光嘅空中門戶「のと里山空港（能登里山機場）」，破天荒改造成全球第一座以 Pokémon 命名嘅機場 —「のと里山 POKÉMON with YOU 機場」！
呢個係由 2026 年 7 月 7 日起至 2029 年 9 月末嘅期間限定企劃。全個機場會被無數嘅 Pokémon 包圍，由打卡位、主題餐廳到限定周邊都一應俱全，粉絲絕對要衝！
📅 限定期間：2026 年 7 月 7 日（星期二）至 2029 年 9 月 30 日
📍 地點地址：石川縣輪島市三井町洲衛（のと里山空港ターミナルビル）
🎈 必睇：111 隻「飛行系」精靈大集結 機場 2 樓中庭會掛住超巨型嘅比卡超同埋飛機氣球！最癲嘅係，機場內外一共裝飾咗截至 2026 年 5 月為止發現嘅全數 111 種「飛行系」Pokémon（不含超級進化及地區型態），大家一定要親眼搵晒佢哋出嚟！
📸 必玩：AR 短片連動、比卡超觀景台
-
三大主題短片：喺機場內用手機可以觀看原創微電影（例如講述憧憬天空嘅寶貝龍特訓故事「とべ！タツベイ」），航廈內仲會有相應嘅寶貝龍與暴飛龍立體雕像互相比襯！
-
比卡超之里山：頂樓觀景台會變成「比卡超山丘」，密密麻麻嘅比卡超超治癒，當中仲隱藏咗其他小精靈等你發掘。
-
打卡地標：1 樓入境大堂有大型復興應援壁畫「きぼうのそら（希望之空）」，仲有比卡超、正電拍拍、負電拍拍嘅 3D 立體公仔迎客！
🥞 必食：主題餐廳「あんのん」限定 Menu 位於機場 3 樓嘅「レストランあんのん（Annon 餐廳）」，將推出期間限定嘅 Pokémon 原創菜單（預計有 2 款班戟同 2 款特飲）。只要同時叫班戟加嘢飲套餐，就會送精美的限定 Pokémon 餐墊紙！
🛍️ 必買：売店「セレンディピティ」獨家精品 2 樓精品店「Serendipity」會獨家發售印有主題 Logo 同「希望之空」插畫嘅原創商品。除咗必備嘅 T-shirt 同鎖匙扣，仲有極具機場特色嘅行李牌同行李帶（每人可能會有購買數量限制）。
🚌 交通及周遊建議（7 月中旬起增設主題巴士）
-
金澤出發（現有路線）：可以搭乘北陸鐵道嘅「能登方面特急巴士（金澤～輪島）」，7 月中旬起每日將有 1 班來回班次會變成 Pokémon 全車身彩繪主題巴士，連接金澤站與機場。
-
能登半島周遊（全新路線）：開港後會新增「能登周遊巴士（期間限定：週末、公眾假期及暑假運行）」，由機場出發帶你玩盡能登嘅 Pokémon 景點！例如 2026 年 5 月新開嘅七尾市和倉溫泉「和倉溫泉小精靈足湯」，以及珠洲市嘅「仙子伊布 with LOVE」紀念雕像。
來源：hot-ishikawa.jp
